Сідр

Увосень 2021, у адным з самых ціхіх і чыстых гарадоў нашай планеты, я назбіраў яблыкаў больш чым мог з’есці і задумаўся, што з імі рабіць – так ўзнікла ідэя зрабіць мой уласны сідр.

Мне раіць мой калега з Нармандыі, чыя фермерская сям’я на працягу многіх пакаленняў вырабляе сідр і кальвадос, не змяняючы старых тэхналогій. Я адбіраю яблыкі розных гатункаў ў першую чаргу для паляпшэння смака і водару, а таксама для атрымання патрэбнай кіслінкі і цукрыстасці. Яблыкі папярэдне наразаюцца паўмеханічным спосабам, а затым прэсуюцца ўручную вінтавым прэсам. Усе выкарыстаныя кантэйнеры і інструменты выраблены з матэрыялаў, дазволеных да кантакту з харчовымі прадуктамі.

Для чыстай і хуткай ферментацыі я выкарыстоўваю дрожджы Gervin ад Muntons, брытанскай сямейнай кампаніі з больш чым векавым вопытам, або SafCider ад Fermentis, кампаніі, якая больш за 160 гадоў займаецца вытворчасцю дрожджаў. Празрысты ферментер дазваляе кантраляваць увесь працэс ферментацыі, а дзякуючы яго канічнай форме дрожджы асядаюць у ніжняй прыёмнай ёмістасці – гэта ачышчае сідр і дрожджы мінімальна ўплываюць на яго смак.

Пасля першаснай ферментацыі сідр разліваюць у стэрыльныя бутэлькі для канчатковага “паспявання” – другаснай ферментацыі. Захоўваецца такі «жывы» непастэрызаваны нефільтраваны сідр пры тэмпературы ад 5 да 14 градусаў Цэльсія ў спецыяльным халадзільніку або склепе, ферментацыя ідзе павольна, з пастаянным кантролем. Праз некалькі месяцаў напой кардынальна зменіць свой смак.